بـسـم الله الرحمن الرحيم
قـصـة حــب حــقــيــقــية
الجزء الاول
"مها وحبها الوحيد"
"قصة حب حقيقية"
"الفصل الأول"
"البداية"
انا مها عمري ٢١سنه من
محافظة الرس ادرس في
كلية التربية في رابع كلية قسم فنون وكانت اخر سنه لي وأهلي من النوع الي يخافون علي وخاصة ابوي واخوي الي متخرج من الجامعه ومن خوفهم علي منعوني من الجوال ومن حفلات صديقاتي
وكنت راضية بقوانين اهلي وتعصبهم وصرت ٢٤ساعة بالبيت مااشوف صديقاتي الا بالمدرسه واهملت شيئ اسمه حب كنت من المدرسه للبيت بس
وان طلعت للسوق فمع امي واخوي اللي مايفارقني بنظراته ومراقبته وكان هو وابوي خايفين علي من الي يغازلون المهم اني ماكنت طالعه على الدنيا الى يوم جاء ذاك اليوم...
"الفصل الثاني"
"بداية تغير مها"
كنت جالسه على طاولتي بالقاعه وكانت جنبي بالطاوله زميلتي ماجدة وزميلتي الي قدامي اسمها نوره وكانت نوره ملتفته علي وتسمع ماجدة وهي تقص علينا قصتها مع صديقها صالح الي قابلته امس بالسوق وفصلت لنا قصتها بالتفصيل الممل من الو للسلام عليكم وكان هذا الشئ جديد علي وكنت مندمجه مع سالفتها وطلعت من المدرسه ورحت للبيت وتغديت مع اهلي وانا بالي مشغول بقصة ماجدة
لاحظت امي اني مااكلت زين وكنت افكر وانا آكل اسئلتني
ان كان فيني شيئ فقلت لها اني بخير وعافيه وانا بقلبي اقول ان فيه شيئ اسمه حب بدا يتحرك بداخلي
دخلت غرفتي وقفلت الباب وانسدحت على سريري وبدت الافكار تلعب براسي وقعدت اتخيل بعدها اخذت التلفون ودقيت على ماجدة ردت علي:
مها: هلا ماجدة
ماجدة: هلا والله
مها: شخبارك طيبه؟
ماجدة: والله بخير ايشفيك مستلجه بالظهريه
مها: والله ماجاني النوم قاعده افكر فيك وبصديقك صالح...
ماجدة: هه هه هه هذا الي مشغل بالك
مها: ايوه بس الي مشغل بالي كيف تعرفتي عليه وكيف حبك
ماجدة: شوفي حبيبتي مها انا تعرفت عليه بالسوق انا شفته شكله جنان وشخصيه قمت غمزت له وهو جاء وعطاني الرقم وصرت اكلمه بشكل يومي ثم قابلته وحبيته وحبني
بس انتي ليه تسألي...
مها: هاه..أ..أأ..أنا لا لا بس حبيت اسأل زين حبيبتي باااااي
ماجدة: بااي ؟؟
سكرت السماعه وصرت افكر اكثر كيف اتعرف على شاب
"الفصل الثالث"
"التخطيط للتعرف على شاب"
قررت اروح للسوق بس عندي مشكلتين ان اخوي يوديني للسوق العصر عشان العصر مافيه احد يغازل لاوبعد راح يكون يراقبني والمشكله الثانيه ان امي راح تكون معي لازم
فكرت فكرت ثم لقيت فكره جهنمية وهي اني اقوم اوسخ عبايتي واروح اقول لامي اني ابغى السوق عشان اذا جاء العصر وجاء اخوي اوريهم عبايتي انها وسخه وأقوم اغسلها وماراح تقضي الا المغرب عشان المغرب راح يكون بالسوق من المغازلجيه
وثانيا اخوي مشغول المغرب عشان يودينا للسوق ويروح
"الفصل الرابع"
"الشروع بالمهمة"
المهم قمت وغطست العبايه بزبادي وشاهي ووسختها
ورحت لأمي وقلت لها:
انا: يمه ابغى السوق العصر ضروري
امي: ايش تبغين بالسوق مالك حاجه فيه
انا: الا يمه ابروح ابدور بلايز وابشري هديه لزميلتي هدى
امي: والله اني ماادري اذا تبين السوق ضروري دقي على احمد خليه يجي العصر ويودينا حتى انا ابي قدور مقاس كبير...
انا: لا يمه انتي دقي عليه انا ابروح ابشوف دروسي علي واجب..
وجاء العصر وجاء اخوي احمد ورحت انا جبت عبايتي ووريتها امي يقالي منهبله وقامت امي تغسلها جاء اخوي احمد قال:
احمد: يمه اذا تتأخرون انا ابروح واذا قضيتوا دقوا علي خلاص..
امي: خلاص رح ندق عليك اذا قضينا.
وبعد صلاة المغرب جاء اخوي وانا مكحلة العيون ولابسه عبايتي المخصره ومشينا
وبالطريق قال احمد لأمي:
احمد: يمه معليش بس انا والله مشغول ومواعد اخوياي وما معاي وقت عشان كذا ابنزلكم بالسوق واذا خلصتوا من السوق دقوا علي وأجي آخذكم خلاص يمه..
امي: خلاص بس اول ماندق عليك تعال ولاتتاخر علينا..
المهم نزلنا بالسوق وقعدت ادور بالسوق ومعاي امي لكن ماقابلني ولا شاب زي مافي بالي
وفكرت ان الشباب الي بالسوق مجرد شباب مغزلجية طرادين للبنات وهذولا النوعيه مش ممكن يدوم الحب بيننا
وقررت اني اروح لمحلات رجالية عشان هناك الاقي شباب جايين يشتروا مو يغازلوا لكن امي معاي كيف اروح؟
جتني فكرة اني اشتري بلوزة
من محل بعيد واذا ابعدت انا وامي عن المحل اقولها ان المحل عطاني بلوزة صغيرة
وراح تقولي امي اني اروح للمحل لحالي وهي تقعد تنتظرني المهم اني دخلت محل انا وامي واشتريت بلوزة وقلت للهندي عطني بلوزه مقاس xL المهم عطاني البلوزه وطلعنا ورحنا من محل الى محل ويوم ابعدنا عن المحل فتحت الكيسه قدام امي
وقلت: اووه شفتي يمه عطاني بلوزه مقاس كبير خلينا نرجع نبدلها
امي: والله انا تعبت روحي انتي بدليها وانا انتظرك بأنتظار النساء
مها: خلاص شوي وراجعه
ورحت ويوم ابعدت عن امي اتجهت الى محل عطورات وهو محل عام يدخله اي رجال واي بنت رحت للمحل ودخلته ووقفت قدام صفة العطورات وقدامي مصري قلت للمصري عطني عطر جيفنشي الجديد ١٧٠مل
وماادري الا جاء من هالمغزالجيه ويوقف جنبي ويقول للمصري عطني عطر جيفنشي الجديد ١٧٠مل ويلتفت علي وفتح كشرته ويقولي هاه القلوب عند بعضه والا لا واقول له انقلع بس بلا بزران
وامشي واروح لصفة العطورات الثانية وانا متجهه وقف قلبي وتقطعت عروقي
وجمد دمي ووقفت بمكاني واناظر عند صفة العطورات الثانية شاب وسيم صح وجسمه حلو مره وصدره منتفخ
يعني يلعب حديد لابس ثوب ولا لبس شيئ فوق راسه وشعره مو طويل مره ولا قصير وبشرته صااافيه وابيض مرره لا واحلى مافيه السكسوكه وعيونه واسعه مره وعسلية ووجهه آيه فيه الجمال بس الشاب واه واه جنتل بصدق ماعمري شفت زيه المهم رجولي عجزت لا احركهم لكن جتني جرأه وقوه عظيمة ومشيت ووقفت وراه وسمعت يقول للمصري ابغى عطر سبلانديد
جتني فكرة المغزلجي الي قبل وعلى طول جيت وقفت جنبه وهو شافني واستحى وابعد عني شوي وجيت قلت للمصري ابغى عطر سبلانديد والشاب انبهر وانا ومن دون شعور غمزت له وعلى طول فهمها الشاب اما المصري قاعد يتبسم المهم رد الشاب وقال للمصري لا لا خلاص معاي سبلانديد ويطلع ورقه ويكتب عليها رقمه واسمه الي هو فهودي وأعطانياها وانا من قوة فرحتي صارت الورقه عندي كأنها حياتي اخذت الورقه وطلعت من المحل وخبيت الورقه في سنتياني ورحت لأمي اللي لقيتها تنتظرني ورحنا شرينا قدور لأمي ودقيت على احمد وجاء اخذنا ورجعنا للبيت ودخلت غرفتي وقفلت الباب وجلست على السرير وقعدت اقلب رقم فهودي وفكرت كيف انا بكلم فهودي وانا ما معاي جوال
جتني فكره اني اكلمه بالهاتف الثابت المهم اني نزلت بالصالة وفصلت اسلاك التلفونات الي بالبيت كله عشان ما احد يتنصت علي ورحت لغرفتي ومسكت سماعة التلفون ودقيت على رقم فهودي:
"الفصل الخامس"
"بداية معايشة الحب"
فهد: نعم
مها: هلا حمودي
فهد: هلا...مين معاي؟
مها: ماعرفتني؟
فهد: تبين الصراحة لاوالله
مها: طيب حاول تعرف
فهد:آه خالتي ريم
مها: لا لا وين خالتك
فهد: ياقلبي لاتستهبلين علي قوليلي مين انتي وخلصيني
مها: اهم شيئ لاتزعل ولاتعصب بس ماعليش حاول مره ثانية؟
فهد:اممم آه عرفتك انتي راعية العطر
مها:ايوا انا راعية العطر
كيفك عمري
فهد:والله بخير آ..آ والله ماادري ايش اقول هههه بس والله انتي احرجتيني عند محل العطورات وقفتي جنبي وانا بصراحه انبهرت يوم شفت عيونك الحلوه وجسمك المليان
مها:هههه تسلم قلبي بس زين انك مو زي اللي مايصدقون على الله بنت جايه عاد كيف وحده تجي عنده هههه؟
فهد: يضحك هههه؟
مها: طيب انت جاي للسوق تشتري عطر بجد ولا جاي تغازل زي الي مالين السوق.
فهد: ايش دعوى ما عمري والله جيت اغازل...
مها: لا لا قلي بجد انت جاي لأيش؟
فهد:بالله تشوفيني جاي اشتري عطر وبالأخير تسأليني ليه جاي
اصلا لو اني جاي عشان اغازل كان مالقيتيني عند محل العطورات ...
يسكتون كلهم شوي....
فهد: طيب حبي مانتي طالعه بكرا للمنتزه او للسوق لحالك او مع اهلك؟
مها: ليه...؟
فهد: بس اسأل..
مها: لا قلي وش قصدك؟
فهد: لا مافيه شيء بس حبيت اني اشوف اذا كنتي طالعه لمنتزه اقدر اشوفك بس نظرة عالماشي...
مها: لا اهلي مايحبون يطلعون للمنتزهات ابدا...
فهد: يعني مااقدر اشوفك
كنت ابجيب معاي هدية بس عاد مادام انك مانتي طالعه اجل بلاش من فكرة الهدية..
مها: كان قلتلي انك معك هدية طيب تجي عندي بغرفتي جناح ولا احلى ماحولنا احد وازين من برا...
فهد(بأبتسامة رضا): طيب ومتى؟ ترا خير البر عاجله
مها:طيب بكرا ماأقدر لان عندي بنات خالتي بعد بكرا انزين اوكي...
فهد: اوكي
مها:خلاص اجل ادق عليك بعد بكرا عشان توصيف البيت اوكي
فهد: اوكي ياقلبي باي
مها: بااااااااي
نمت ذيك الليلة نوم لذيذ
لا وبعد حلمت بفهودي حلم رومنسي طويل وحلو اظاف نكهه جميلة لنومي وقمت قبل المغرب على طق امي لباب غرفتي قمت وكان فيني نشاط غير طبيعي وفتحت الباب ولا امي طايره شوشتها ومعاها مكنسه
قلت بسرعه: خير يايمه ايش فيه؟
امي: مين الي فاصل سلك تلفوني هاه...؟
مها: يمه انا الي فاصلته لان امس دق واحد ازعجني يغازل وجيت فصلت السلك ونسيت اشبكه ولاصار شيئ ليه كل هالمشكله..؟
امي: انا انتظر جارتنا موضي تدق علي من الصبح ولادقت اثر التلفون مفصول...اممم
طيب البسي بسرعه بعد صلاة المغرب بيجون خواتي وبناتهم لا تأخرين..؟
دخلت الغرفة وتروشت ولبست لبسي ونزلت تحت للصالة ولقيت بنات خالاتي وخالاتي وسلمت عليهم وجلسنا مع بعض بالحديقة وسولفنا وتقهوينا ويوم جت الساعة ثنتين راحوا خالاتي ورحت انا لغرفتي وقفلت الباب وانسدحت على السرير وراحت افكاري مع فهودي وتخيلت اني انا وياه بباريس وقاعدين نتمشى بشارع الشانزلزيه وتخيلت انه قاعد يشفشفني بساحة الكنكورد
وصحيت من احلامي وتذكرت اني لازم ادق على فهودي عشان اوصف له البيت
ودقيت عليه ووصفت له البيت وسألني ايش يلبس ثوب ولا جنز وقلت له البس ثوب وابغاك ترسم وقمت ونظفت غرفتي وجهزت لبسي وعطرت الغرفه ونمت نوم
لذيذ وكل أحلامي بفهودي ومقابلتنا بكره وقمت من بكره على آذان العصر وكان هذا اليوم يومي الوردي واللي كانت ابتساماتي ماتفارق محياي وجهزت الغرفة من شموع وورود حمراء وبعد ستيريو واغاني كلاسيكية رومنسية ونزلت تحت عند امي اللي كانت تشرب شاهي وتسمع الاخبار وسولفت معاها شوي وسحبت منها معلومات ان اخوي بيمشي بعد صلاة العشاء
يبغى يكشت ثلاث ايام وان امي فيها نوم وتبغى تنام بعد صلاة العشاء وابوي باستراحة اخوياه وما يجي
الا بعد صلاة الفجر يعني الجو
من صالحي وقعدت بغرفتي انتظر صلاة العشاء
وبعد صلاة العشاء جاء اخوي واخذ اغراضة ومشى وامي بعد نامت وابوي على روتينه اليومي بالاستراحه
رحت لغرفتي ولبست لبسي وحطيت مكياج خفيف وزينت نفسي ومسكت سماعة التلفون ودقيت على
حمودي وجاء للبيت ووقف سيارته بعيد عن البيت
وجاء على رجوله وفتحت له الباب...
تــابــعو الــجزء الــثـاني
الإثنين فبراير 18, 2008 10:59 am
